തിരുവനന്തപുരം: സംസ്ഥാനത്തെ പൊതുവിദ്യാലയങ്ങളിൽ പ്രവർത്തിക്കുന്ന ലിറ്റിൽ കൈറ്റ്സ് ഐടി ക്ലബ്ബുകളുടെ 2026-29 ബാച്ചിലേക്കുള്ള അംഗത്വത്തിന് 12വരെ അപേക്ഷിക്കാം.
നിലവിൽ ലിറ്റിൽ കൈറ്റ്സ് യൂണിറ്റുകൾക്ക് അംഗീകാരം ലഭിച്ചിട്ടുള്ള സ്കൂളുകളിലെ 2026-27 അധ്യയന വർഷത്തിൽ എട്ടാം ക്ലാസിൽ പഠിക്കുന്ന 20 മുതൽ 40 വരെ വിദ്യാർഥികൾക്കാണ് ഓരോ സ്കൂളിലെയും ക്ലബ്ബിൽ അംഗത്വം നൽകുക.
അംഗത്വത്തിനായി താൽപര്യമുള്ള വിദ്യാർഥികൾ 12നകം അതത് സ്കൂൾ മേധാവികൾക്ക് അപേക്ഷ സമർപ്പിക്കണം. 18ന് രാവിലെ 10ന് എല്ലാ യൂണിറ്റ് സ്കൂളുകളിലും പ്രത്യേക അഭിരുചി പരീക്ഷ നടത്തും. അഞ്ച്, ആറ്, ഏഴ് ക്ലാസുകളിലെ ഐടി പാഠപുസ്തകങ്ങൾ, ഐടി മേഖലയിലെ പൊതുവിജ്ഞാനം, ഗണിതം, ലോജിക്കൽ ചിന്ത എന്നിവയെ അടിസ്ഥാനമാക്കിയാണ് പരീക്ഷ.
അഭിരുചി പരീക്ഷയുടെ മാതൃക പരിചയപ്പെടുത്തുന്ന ക്ലാസുകൾ 12, 13, 14 തീയതികളിൽ കൈറ്റ് വിക്ടേഴ്സിലൂടെ സംപ്രേഷണം ചെയ്യും. പ്രോഗ്രാമിംഗ്, റോബോട്ടിക്സ്, ഹാർഡ്വേർ, അനിമേഷൻ, ഇലക്ട്രോണിക്സ്, മലയാളം കംപ്യൂട്ടിംഗ്, സൈബർ സുരക്ഷ, വീഡിയോ ഡോക്യുമെന്റേഷൻ തുടങ്ങിയ മേഖലകളിൽ പരിശീലനം ലിറ്റിൽ കൈറ്റ്സ് ക്ലബ്ബുകളുടെ ഭാഗമായി ലഭിക്കും.
സ്കൂൾ പ്രവർത്തനത്തെ ബാധിക്കാതെ മാസത്തിൽ കുറഞ്ഞത് നാല് മണിക്കൂർ പരിശീലനം അംഗങ്ങൾക്ക് ഉറപ്പാക്കും. പ്രവർത്തന മികവിന്റെ അടിസ്ഥാനത്തിൽ എ, ബി, സി ഗ്രേഡുകളിലുള്ള സർട്ടിഫിക്കറ്റുകളും നൽകും.
സ്കൂളുകളിലെ ഐടി പ്രവർത്തനങ്ങൾ, ഡിജിറ്റൽ മാപ്പിംഗ്, സൈബർ സുരക്ഷാ ബോധവത്കരണം, സ്കൂൾ വിക്കി പുതുക്കൽ, ഐടി മേളകളും ക്യാമ്പുകളും സംഘടിപ്പിക്കൽ, കൈറ്റ് വിക്ടേഴ്സിനായി വാർത്തകളും ഡോക്യുമെന്ററികളും തയാറാക്കൽ തുടങ്ങിയ വൈവിധ്യമാർന്ന പ്രവർത്തനങ്ങളും ലിറ്റിൽ കൈറ്റ്സ് ക്ലബ്ബുകൾ ഏറ്റെടുക്കും.
Deepika
E-paper LOGIN
LOGIN
